نستافدو بالدريجة : “حيوان تاياكل وجبة وحدة فحياتو ؟؟”

"مقال بالدريجة"




قبل مانهضرو على هاد الحيوان غادي نسرحو بالخيال ديالنا.. ملي كنا صغار كنا تانشوفو الخروف تاياكل فالماكلة موسخة و داكشي منو للأرض و قلنا علاش ملي تاييكل هو هادشي ماتايمرضش ؟
علاش ماتكون عندي معدة بحال ديالو لي تصبر ليا على كولشي ؟ و أنا غير ناكل ساندويش من الزنقة تانمرض..
هادو كانو تساؤلات ديال الطفولة.. و لكن التساؤلات لي جاوني من بعد هو علاش هاد الماكلة كااع ؟ مالنا على حالتنا تانضيعو كل نهار ما يقارب ساعتين فالنهار غير باش ناكلو و تانضيعو وقت باش نخدمو على ود هاد لماكلة و تانضيعو فلوس غير باش ناكلو.. علاش مانكونوش كائنات ماكاتاكلش ؟
ولكن ايلا اعتبرنا الانسان كنظام ثيرموديناميكي ضروري خاص طاقة تستهلكها باش تستعملها فالاعمال اليومية.
ولكن علاش مانكونوش مثلا بحال النباتات ؟ كاتستهلك الطاقة بشكل سلس و سهل غير عن طريق التركيب الضوئي ؟
و أنا تانبحث تصادفت بيلا التساؤلات ديالي ماشي غير كلام فارغ كيفما غايقولو بزاف د ناس لي غايقراو هاد المقدمة.
تصادفت معا واحد الحيوان تايستعمل التركيب الضوئي باش يتغذى. تانكرر حيوان و ماشي نبات.. ولكن كيدار ليها ؟؟
هاد الحيوان تاهو تاياكل و لكن باش كايتفوق علينا هو أنه تاياكل وجبة وحدة فحياتو. و الميزة ديالو هو أنه كايتقن عملية التركيب الضوئي.


الحيوان لي سميتو Sea slug هو حيوان بحري الطول ديالو من 1 تال 33 سنتيمتر. فالست الشهور اللولة ديالو ماتاياكل تا حاجة من غير واحد الوجبة.. تايمشي يقلب على واحد العشبة سميتها Algue اأو Vaucheira litorea
تايقصدها نيشان و تايضرب واحد لادوز صحيحة من ديك لعشبة. هي لي كاتعطيه داك اللون الخضر و ديك القدرة على التركيب الضوئي.

ملي حللو هاد الكائن لقاو بيلا ملي تاياكل ديك العشبة تايسرق ليها كاع دوك المعامل ديال التركيب الضوئي و الجينات لي
مسؤولة عليه و تا داك اليخصور لي كاين فيها.
لحقاش الباحثين ملي حللو الحمض النووي ديال هاد الكائن لقاو بيلا عندو جينات لي سرقها من العشبة لي تاياكل.
هادا مثال حي على انتقال الجينات من كائن متعدد الخلايا لكائن اخر.. .
اضافة اخرى .. هاد الصفة ماكاتورثش .. يعني الولد يلا تزاد خاصو يمشي يخرج يقلب على العشبة يلا بغا يعيش.
شكرا على قراءة المقال ونتلقاو ف مقال أخر ومع معلومات أخرى وهاد لمرا بالدريجة ..

بتصرف..




قم بكتابة اول تعليق

اترك تعليقاً

لن يتم نشر بريدك الالكتروني في اللعن